فتاة أحلامي
ــ يا ترى .. " فتاة أحلامك ".. مواصفاتها ايه ؟
ــ بصي يا ستي .....!؟
حلوة .. حلوة حلوة يعني .. ؛ بيضة .. شعرها ناعم وطويل .. لونه أصفر , مش شرط يكون لونه الطبيعي كده , ممكن يبقى مصبوغ .. بس صبغة نضيفة يعني .. متظبط بالخصلات .. مش ضرباه أكسجين و خلاص .. عنيها خضرا أو رمادي أو زرقة أو عسلي فاتح ... أي لون فاتح .. جسمها يكون حلو .. هيفاء وهبي أو نانسي عجرم .. "ممشوق" زي ما بيقولوا
تكون بتعرف تتطبخ كويس .. بتعرف تعمل أكبر قدر ممكن من الأطباق و أصناف الأكل .. مشوي و محمر و مسلوق .. حلو و مشروبات .. كله .. أي حاجة أطلبها تكون بتعرف تعملها .. ما بتشتغلش ، قاعدة في البيت .. مهتمة بجمالها أكتر من بتوع السيما .. بتلبس على أحدث موضة و أكمل شياكة .. أرجع من الشغل ، يكون الأكل جاهز و سخن ، أعد آكل معاها .. وهي لبسة أحسن و أشيك هدوم عندها
شخصيتها قوية .. لها فكرها الخاص .. و أرائها المتنوعة المبنية على أسس و قواعد سليمة .. فاهمة ايه اللي بيحصل حوليها .. بتعرف تتكلم كويس .. و واثقة من نفسها جداَََََ
متدينة .. و مقتنعة بالدين .. عارفة واجباتها و حقوقها الزوجية كويس أوي .. برة البيت بتلبس خمار ولو نقاب يكون أحسن .. تعرف إزاي تربي الأولاد .. على الإلتزام و الإحترام و الأخلاق و المثل .. مع الحفاظ على حريتهم و ارائهم الخاصة و قدرتهم على الإختيار السليم و ثقتهم بنفسهم
تفضل بقى كده طـــــــــــــــــــــول عمرها .. !!؟
بس خلاص !!؟