سيرة ذاتية

ــ إســـــــلام ! .... إستنى يا إسلام ........ مش عيب تخليني أجري وراك في الشارع كده ؟! ... خلي عندك رحمة يا أخي ..

ــ إيه ؟! ... في إيه ؟ .. عايزة إيه تاني يا منى

ــ طيب نرجع نكمل كلامنا جوة .. هنقف كده في الشارع ؟!

ــ خلاص .. مفيش كلام تاني يتقال .. أنا قلت كل اللي عندي ..

ــ صدقني يا إسلام .. أنا هقوله .. بس في الوقت المناسب .. أصبر بس عليَّا شوية ..

ــ هتقوليله إيه ؟! .. خلاص يامنى .. الكلام ده فات أوانه خلاص .. و بعدين إنتوا في بينكوا طفل دلوقتي ..

ــ أنا مش قادرة أعيش معاه .. بكرهه .. أرجوك يا إسلام .. إوعى تتخلى عني

ــ صدقيني يا منى خلاص .. ماعدش ينفع .. و أنا كمان مقدرش أعمل كده في احمد .. ده صاحبي ..

ــ صاحبك منين ؟! .. ده أنا حيالة لسه معرفاك عليه من شهر .. إنت هتعيش ؟!!

ــ و لَو ! .. بدال عرفته و سلمت عليه .. يبقى مينفعش ..

ــ أ ه ه ه .. قول كده بقى .. إنت بتتلكك .. عايز تخلص منِّي ..

ــ و انا هعمل كده ليه إن شاء الله ؟!

ــ أنا من ساعة ما شفتك مع منة في البروفا .. و انا حاسّة إن في حاجة ..

ــ منة ؟!!

ــ أ ه منة .. منة شلبي .. ولا هتنكر ؟!

ــ بلاش هبل يا منى .. منة ده زي أختي .. إنت عارفة إن لا يمكن يكون في حاجة بينا

ــ لأ إنت بتضحك عليا .. كلامك معاها و نظراتك ليها لا يمكن تكون طبيعية أبداً .. ولا إستنى .. إستنى إستنى .. فاكر الإسبوع اللي فات .. لما ظبتك مع هند صبري في النادي .. فاكر إتخضيت و إرتبكت إزاي أول ما شفتني ...

ــ لا .. إنت الظاهر حصل في مخك حاجة .... بقولك إيه ... أنا ماشي .. قبل ما تشكي في هدى سلطان ..

ــ يا إسلام .. أرجوك .. أرجوك متعذبنيش أكتر من كده .. طب قولي .. قولي في إيه .. قولي عايزني أعمل إيه و أنا أعملهولك ...

ــ صدقيني مبقاش ينفع الكلام ده خلاص .. الوداع يا منى ..

ــ الوداع ؟! .. إسلام .... يا إسلام ... ماشي يا إسلام ... مبقاش انا منى زكي .. لو مخلتكش تندم !!