بلاوي
ــ ممكن بس حضرتك تجيبلي المبرد ده ؟
ــ خير هو حضرتك تعبانة ولا حاجة ؟ .. أصله تحت الكرسي بتاعك على طول
ــ معلش أنا أسفة .. هتعبك .. أصلي لسه حاطته مونيكير و لازم أقعد كده لحد ماينشف
ــ طيب .. تحت أمرك
ــ متشكرة قوي .. لو عايز ممكن حضرتك تجيب الشاي بتاعك و تيجي تقعد معايا .. أصلي قاعدة لوحدي برده و زهقانة قوي
ــ أوكي .. أنا معنديش مشاكل .. ثانية واحدة
ــ معندكش مشاكل ؟ .. يا بختك .. أنا بقى زي ماتكون مشاكل الدنيا كلها إتفقت مع بعض إن هما يجولي النهاردة الصبح
ــ ياساتر ... يارب يكون خير ؟
ــ أول حاجة .. صحيت الصبح لقيت عم صبحي واخد أجازة .. هو كان قايللي طبعاً .. بس أنا نسيت .. عم صبحي ده الطباخ بتاعنا .. معرفتش أفطر خالص .. و خصوصاً إن تامر جوزي مسافر الأسبوع ده لوكسومبرج .. عنده شغل هناك .. و بعد ما قمت .. لقيت المايه مقطوعة .. يووووه .. إتخنقت .. مقدرتش حتى أحط منوكيري في البيت .. مسحت وشي بكلينكس .. و جيت على هنا على طول ...
ــ هو حضرتك بتكلمي بجد ؟
ــ معلش بقى .. دوشتك
ــ لا أبداً .. ياسلام .. قد إيه الواحد لما يشوف بلاوي الناس .. تهون عليه بلوته
ــ بلاوي إيه كفاللة الشر ؟
ــ لأ .. حاجة بسيطة .. أحكيلك يا ستي : .....
أول إمبارح كنت خرجت أنا و المدام و الأولاد .. يعني .. فسحة كده بسيطة .. و خصوصاً إن تاني يوم كان أجازة ليا .. اللي هوه إمبارح يعني .. رجعنا من الخروجة ده اخر إنبساط .. قليل لما بنعد مع بعض قعدات لذيذه زي ده ..
ــ طب كويس .. ها و بعدين ؟
ــ بس يا ستي .. صحيت إمبارح براحتي بقى .. صحيت على الضهر كده .. الحمد لله يارب المايه مكنتش مقطوعة ..... المهم .. لقيت محمود إبني خد العربية الصبح .. هو كان قاللي طبعاً .. بس أنا نسيت .. فكان أول خبر يوصلني إن محمود خبط راجل بالعربية و جري .. البوليس مسكه على الطريق السريع .. طريق مصر إسكندرية الصحراوي ..
ــ إيه ده معقولة ؟
ــ نزلت جري على القسم .. بس الحمد لله .. منسيتش أحط جِل على شعري وأنا نازل .. قبل ما خش القسم .. الموبايل بتاعي رن و قالوللي مراطك جتلها نوبة السكر و هي في الشغل و دخلت في غيبوبة .. أقعدت أفكر أشوف أعمل إيه .. إتصلت بمحامي زميلي .. قولتله هوه يروح يشوف محمود إبني في القسم .. و أنا أروح أشوف والدته .. و أول ما وصلت المستشفى عرفت مراطي جتلها نوبة السكر ليه .. في حد إتصل بيها و قالها إن هند .. بنتي في تالتة حقوق السنة دي .. عملت عملية إجهاض و حالتها خطيرة .. مقدرتش أقعد في المستشفى .. رحت على القسم أشوف أخبار الواد إيه .. لقيت في الطريق نادر .. إبني التاني في أولى ثانوي ماشي مع إصحابه في وسط البلد .. و في إيده سجارة .. مش مهم .. يعني جت عليه .. سبته و رحت القسم .. لقيت الراجل اللي خبطه محمود مات .. و المحامي قدر يتفق مع أهل الضحية على ربع مليون جنيه دية .. و يتنازلوا عن القضية .. بس ياستي .. إمبارح الحمد لله قدرت أبيع العربية بمبلغ كويس .. و مستني اهوه الشهر العقاري يفتح علشان أسجل مع المشتري المكتب بتاعي اللي قبضت عربونه إمبارح ..... عن إذنك بقى .. زمانه فتح !!