ديب فريزر

خد يا أسطى ... واحد من الجنيه ...

بكره ميعاد القسط .. مش عارف أعمل إيه .. أنا عارف إيه اللي جبرني على القرف ده .. قال ديب فريزر قال .. ديب فريزر إيه و بتاع إيه .. هي أمها السبب .. أكيد هي اللي زنت عليها علشان نجيبه .. أنا حتى مش عارف هو بيعمل إيه .. لسه يادوبك مخلصين قسط التليفزيون .. يقوم يطلعنا الديب فريزر .. التليفزيون .. ده أنا حتى مبعرفش أتفرج عليه ..

في باقي واحد من الجنيه هنا يا أسطى ..

لأ بس ساعات بتفرج على مطشة .. أيام ما كانوا بيعرفوا يجيبوها .. جبناه قبل الكاس العالم .. قال علشان نتفرج عليه .. بلا خيبة .. تمثلياته مملة .. و خنيقة .. يبقى الأهلى بيلعب في كاس العالم و ميعرفوش يجيبوه .. جامد الأهلي اليومين دول .. كويس إن هما لسه بيعرفوا يجيبوا الدوري العام .. بس سمعت إن هو لسه خسران من الإسماعيلي خسارة جامدة .. مش عارف تلاتة و لا أربعة .. تلاتة ولا أربعة .. الجاتوه اللي جابهولنا حمدي كان بتلاتة و لا أربعة ؟ .. لأ بس كان حلو .. عايز أبقى افتكر أسأله هو جابه منين .. هو كده رخيص ولا إيه ؟ .. مش عارف .. مبتعرفش تعمل جاتوه .. كل ما أقولها إعملى حاجة .. تقوللي مبعرفش .. أنا عارف إيه اللي خلاني أطس في نظري و أتجوزها .. إيه اللي خلاني اطس في نظري و خلاني أتجوز اصلاً .. مصاريف ضايعة على الفاضي و خلاص .. و يوم ما أتجوز أتجوز ده ؟ .. نفسي أفتكر أنا كنت شايفها إزاي ساعتها .. لأ بس مش كل الجواز .. بص على الواد نادر .. مراطه مدوقاه الشهد .. معيشاه في الجنه .. ياسلام .. يابخته .. مزيكا .. حتى المزيكا بطلت أسمعها .. سمعت إن عمرة دياب نزل شريطين من بعد ما إتجوزت ..

يا أسطى في نص جنيه باقي هنا يا اسطى ...

كان عمري ما أفوتله شريط أبداً .. أفوته ؟! .. ده أنا كنت بأسمعه قبل ما ينزل السوق .. كنت أتابع ميعاده من قبليها بتلات تشهر .. ميعاده ؟ .. ربنا يحسن ختامنا جميعاً ............ قال ديب فريزر قال ..

إنت مش ناوي تديني الباقي ولا إيه يا اسطى ...

ماهو في إيدك يا عم الحاجة من ساعة .. بطلوا اللي إنتوا بتشربوه ده بقى ... !!