الآنسه رانيا

ــ ألو ..

ــ حسام معايا ؟

ــ أيوة ...... مين بيتكلم ؟ ...

ــ إزيك يا حسام .. أنا رانيا ..

ــ أهـلاً ....
إستنى يا محمود أنا عايزك ..
ءء أهلا و سهلاً ........ مدام رانيا بتاعة المبيعات ؟!!

ــ لأه .. مبيعات إيه ؟ .. أنا رانيا .. كنت زميلتك في الكلية ..

ــ يااااااااه .. إزيك يا رانيا ... عاش من سمع صوتك ... إيه يا بنتي كنتي فين ؟

ــ أهوه .. في الدنيا ....... قلت أسأل عليك .. و اشوف اخبارك إيه ..

ــ الحمد لله .. كل شئ تمام ......
طيب يا محمود روح إنت دلوقتي .. و إبقى تعالى إحضر إجتماع الساعة تلاتة .......
إنت عاملة إيه ؟ .. و إيه اخبارك ؟

ــ أنا كويسة الحمد لله .. بشتغل دلوقتي ! ..

ــ إيه ده ؟! .. معقولة ؟!!

ــ أه والله .. شغالة في إدارة تنفيذ شركة "أولاد داوود" مرة واحدة !

ــ طب والله كويس ......... إتجوزتي ولا لسه ؟

ــ لأ لسه ..

ــ ولا إتخطبتي ؟

ــ ولا إتخطبت ..

ــ أنا قلتلك محدش هيبصلك مصدقتنيش !

ــ إمشي .. فشر .. دول طوابير على الباب يا بابا .. بس انا أقول "أه" ..

ــ إيه .. عايزاهم يضربوكي ولا إيه ؟!!

ــ لسه بتستظرف .. مش هتكبر بقى !!

ــ يا بنتي ده خفة دم .. و "خفة الدم" .. يعني "حسام" على طول ..

ــ ماشي يا أخويا .. قوللي بقى .. إنت أخبارك إيه ؟

ــ أنا الحمد لله ...
تعالي يا سناء ......................... لأ ... إبعتي الورق ده لأستاذ يوسف .. خليه يشوفه و يقوللي رأيه في الإجتماع .. قوليله كده .. و عدي على مدام منى خليها تجيب ملف العبور معاها الإجتماع ...
أيوة يا رانيا .. كنا بنقول إيه ؟

ــ أنا معطلاك ولا إيه ؟

ــ لأ .. لأ .. أبداً ..... أنا دلوقتي فاضي ..

ــ كنت بقولك إنت أخبارك إيه ؟ .... إتجوزت ولا لسه ؟ ..

ــ لأ .. أنا لسه متجوزتش .. مستنيكي تسبقيني .. و تقوليلي رأيك في الجواز إيه ..

ــ ولا خطبت ؟

ــ لأ برده لسه ..

ــ مفيش كلام .... ؟!

ــ ممممم .... "منال" قالتلك إن أنا رايح أخطب الأسبوع اللي جاي ..

ــ قالتلي أه ...... "نورا" ؟

ــ إيه رأيك ؟

ــ رأيي في إيه .. و انا مالي ..

ــ إيه يا سناء في إيه ؟ ..................... طب إتفضلي دلوقتي و مدَّخليش حد عليا .... هناديلك بعد شوية ..

ــ مش هينفع الكلام كده .... تحب نتقابل فين ؟ ..

ــ ميتهيئليش إنه ينفع يا رانيا ....... إتأخرتي قوي !

ــ إنت اللي إتأخرت يا حسام

ــ على العموم .. ملوش لزمه الكلام ده دلوقتي .. كل شيء قسمة و نصيب

ــ إنتوا لسه على الباب .. محصلش لسه حاجة .. يبقى أكيد لسه في فرصة

ــ نورا وقفت معايا .. ساعدتي بكل قوتها .. أنا إتفقت معاها و إدتها كلمة .. مقدرش أرجع فيها يا رانيا ..

ــ إسمع بس .. نورا هتفهم .. و هتقدَّر .. و هتحس بينا .. اكيد مش هتزعل ..

ــ أنا مقدرش اساساً أحطها في موقف إختيار زي ده .... إن شاء الله يا رانيا ربنا يرزقك بواحد أحسن مني ميت مرة ..

ــ أيوة يا حسام .. بســ

ــ أنا آسف .. أنا هضطر أستأذن دلوقتي .. عندي إجتماع الساعة تلاتة .. و لازم أعمل حاجات مهمة قبل ما يبدأ .. عن إذنِك .... أنا آسف فعلاً يا رانيا ....... سلام

ــ سلام