حلم كبير علينا

بيت صغير يجمعنا
و طفل يكبر قدام عنينا
ياتري ده حلم .. كبير علينا ؟

غرسنا حبة و إستنينا الحصاد
من غير نقطة مية .. ولا حتى شوية سماد
و المصيبة إن الارض .. كان ملموم عليها الجراد

بيت صغير يجمعنا
و طفل يكبر قدام عنينا
ياتري ده حلم كبير علينا ؟

بدأت بالعين في العين
و الإبتسامة .. الـ مالية الخدين
و الكلمة الحلوة .. بين الشفتين

نتكلم بالساعات و الساعات
و نتقابل بميعاد و من غير ميعاد
و الهدايا في الفلانتاين .. و فـ أعياد الميلاد

خلصنا الرصيد .. و إتداينا كمان
مفضلش اللي نقدر .. نقاوم بيه الزمان
و مع أول مطب .. إتكسرت العفشة .. و وقع الشكمان

غلطنا .. لما عرفنا اللي كان
شايف الشرخ بينا .. و ماكتفاش بالكتمان
دور على فاس .. و في الشرخ يضرب .. بكل عنفوان

بيت صغير يجمعنا
و طفل يكبر قدام عنينا
ياتري كان حلم كبير علينا ؟

حبيتك ? .. ده أكيد
ضحيت علشانك ؟ .. تفتكري كان خلص الرصيد ؟!
ضحيتي علشاني ؟ .. مكنش الصرح وقع .. من شرخ بسيط

بيت صغير يجمعنا .. مش مهم
و طفل يكبر قدام عنينا .. مش لازم يبقى نفس الطفل
طلع الحلم ......... كبير علينا !