غشاوة
كان الليل حالك السواد .. و كأن المصابيح لم تُخترع بعد .. و كأن القمر قد إرتطم بنيزك و إنفجر
ــ في راجل أهوه .. إسأله على أي حتة نقدر ناخد منها تاكسي
ــ إستني بس لما الشارع ده يخلص .. أكيد هيطلع على شارع رئيسي
ــ كده الوقت هيتأخر علينا .. و إحنا في المنطقة المقطوعة ده
ــ بابا .. بابا .. أنا عايزة ايس كريم
ــ إستني يا حبيبتي دلوقتي
ــ أنا مليش دعوة .. انا عايزة أيس كريم
ــ يا حبيبتي اجيبلك منين دلوقتي .. حاضر .. لو لقينا محل فاتح .. هاجيبلك
ــ في سوبر ماركت فاتح اهوه
ــ طيب .. تعالواـــــــــــــــــــــ
ــ شوفي إنتي عايزة إيه .. يلا
ــ ممكن توسعيلي يا حبيبتي .. اجيب حاجة بسرعة كده على طول
ــ وسعي لطنط يا سارة
ــ إيه ده .. مش ممكن .. سامح؟!
ــ أنا آسف ! .. إحنا نعرف بعض
ــ إيه ده ?! .. معقولة ?! .. مش فاكرني ?! .. أنا سارة .. سارة .. كلية الآداب .. تاريخ .. أربع مواد في تانية
ــ ســـارة ؟! ... مش ممكن .. إنتي إتغيرتي قوي
ــ تخنت قوي مش كده ؟! .. معلش بقى الجواز و العيال .. ده بنتك ؟
ــ أه .. بنتي سارة
ــ مم .. أنا بقى عندي أحمد .. ونيرة .. أحمد في ساته إبتدائي .. و نيرة في رابعة
ــ إنتي جتيلنا من السما .. متعرفيش بقى إزاي نلاقي تكسا في المنطقة المقطوعة ده
ــ نسيت اعرفكوا ببعض معلش .. سارة كانت زميلتي في الكلية .. صافي مراطي
ــ أهلاً و سهلاً
ــ أهلاً بيكي
ــ آخر الشارع كده .. في شارع رئيسي .. هتلاقوا فيه مواصلات كتير
ــ مش قلتلك ؟! .. طيب نستأذن إحنا بقى علشان الوقت إتأخر
ــ أه طبعاً إتفضلوا .. أنا ساكنة هنا .. تالت عمارة على اليمين .. ياريت تشرفونا بالزيارة
ــ إن شاء الله .. يلا يا سارة ؟
ــ هستناكوا
ــ لأ خلاص هنيجي .. هجيب سامح و سارة و هنيجي كلناــــــــــــــــــــــــ
ــ يـــــــــــــــــاه .. زمن
ــ إيه بقى ياعم حكاية سارة ده ؟ .. و أنا أقول إشمعنا سارة ؟ .. إشمعنا سارة ؟ ... أتاري
ــ متستعجليش على رزقك .. هحكيلك كــــــل حـــــــاجة ......... هية الدنيا نورت ولا أنا متهيئلي ؟!
ــ سلامة نظرك يا حبيبي !