ميزة السينما
ــ يلا يا حبيبتي .. ولا مش عايزة تتفرجي على الفيلم ؟
ــ لأ عايزة .. خلاص ثواني أهوه
ــ طب يلا .. لحسن ده قرب يبتدي
ــ "قرب يبتدي" ده إيه ؟ .. هو مش على الكمبيوتر ؟
ــ ها ها .. طب يلا
ــ خلاص .. قربت أخلص .. هاشطف الطبقين دول واجي
ــ أعملك شاي معايا ؟
ــ شاي إيه بقى .. ما تيالا
ــ نشرب شاي و إحنا بنتفرج ؟
ــ سيبك من الشاي و تعالي
ــ يعني الشاي هيتعمل في أد إيه .. على طول اهوه
ــ أخ .. نسيت ألم الغسيل من عالحبل .. وقف وقف .. هاروح ألمه واجي
ــ لأ مش مهم الغسيل .. لميه الصبح
ــ لأ .. مينفعش اسيبه .. لو طلعت عليه الشمس هيجرب .. و بعدين كده هيلم تراب
ــ لميه بعد الفيلم
ــ هابقى تعبانة و عايزة أنام وهاكسل .. ده هو هيتلم في ثواني على طول
ــ رايحة فين تاني ؟
ــ بدال وقفنا بقى .. هاكلم ماما قبل ماتنام
ــ ليه في حاجة ؟
ــ لأ .. هطمن عليها بس .. أصل قولتلها إني هاكلمها
ــ أه أه .... أي ..
ــ إيه ؟ .. في إيه ؟ .. مالك ؟
ــ رجلي شدت
ــ شدت و إنت قاعدة كده
ــ أنا عارفة ؟ .. وقف وقف .. و تعالى دلكهالي
ــ طب إستني الحتة ده
ــ أي .. تعالى بسرعة .. يعني هو الفيلم هيطير .. ماهو موجود على الكمبيوتر بقاله شهر
ــ بقولك إيه .. الفيلم ده ممل .. أنا هقوم أنام
ــ ماهو طبعاً لازم يبقى ممل