بطريقة أو بأخرى

ــ خــــــــــــــلاص .. مش قادرة خالص يا ماما

ــ معلش يا بنتي .. شد حيلك .. خلاص هانت أهه

ــ مصدعة و دايخة و مش قادرة اركز خالص .. و حاسة إني نسيت كل حاجة ذاكرتها ..

ــ إنت بس متهيألك من القلق .. هاعملك ليمون دافي .. إشربيه .. و بعد كدة إقري شوية قرآن و إنتي تبقى زي الفل .................. إنتي فاضلك كتير في مادة بكرة ؟!

ــ إن شاء الله هاخلصها قبل ما انام ..... بس الصداع ده يسبني في حالي بس

ـــــــــــــــــــــــــــــــــــــــــــــ

ــ تعالي يا أمل .............................. إبعتي لسعيد السواق .. خليه يجهز العربية .. أنا هنزل دلوقتي

ــ دلوقتي يا دكتور ؟! .. ده الإجتماع لسه فاضل عليه أكتر من ساعة ..

ــ أه منا عارف .. أصلي عايز أعدي على المصنع الأول .. و بعدين عايز أروح الإجتماع بدري شوية .. عايز أتكلم في موضوع مع "عمر" بيه

ــ أيوة بس إيـ .....

ــ بس إيه ؟ .. إتكلمي

ــ الجامعة إتصلت من شوية و سابت لحضرتك رسالة ..

ــ إيه عايزين إيه ؟ ....

ــ بيقولوا لحضرتك إن الإمتحان فاضل عليه تلات أيام و لسه حضرتك مبعتهوش ..

ــ أه صحيح .. أنا نسيت الموضوع ده خالص ............... طيب إبعتي لسعيد قوليله إني هنزله بعد عشر دقايق .. خليه يروح يفول العربية و يشتري الجرايد ...

ــــ و بعد عشر دقايق ـــ

ــ أمــــــــــــــــــل ...

ــ نعم يا دكتور ...

ــ هاتيلي الجاكت من عندك ......... و خدي الورق ده إكتبيه عـ الكومبيوتر و إبعتيه في إيميل للجامعة