بحبها .. ولا لسه بكرهها ؟
بصالي و مبحلقالي .. بصتلها و ضحكت .. فضلت بصالي و مبحلقالي .. بصتلها و إستغربت .. و هي بصالي و مبحلقالي .. قامت على وشي لطماني.
بصالي و مبحلقالي .. بصتلها و إستحلفت .. فضلت بصالي و مبحلقالي .. فضلت باصصلها .. و صوابعي ضمتها .. و بالبونية و في عنيها هضربها .. قامت خدتني في حضنها .. و بإيديها حطت راسي على كتفها.
واقف و مع اصحابي بهزر .. لقيته جاي و من عينه بيطق الشرر .. بطايقكوا فين ياد إنت و هو ؟ .. عملي بلطجي يا روح أمك .. إطلع عـ البوكس.
جريت خطوتين .. الكرسي اللي جنب الشباك .. و مشينا .. و للأجرة لمينا .. و في الإشارة إستنينا .. و بعد الإشارة علشان زبون ينزل ركننا .. و لقينا عربية قدام العربية بتفرمل .. وفي السواق بيهزأ و بيهدد .. عشان على حارته زنق.
لقيته بيعدي الشارع .. عرفين مين ده ؟ .. و إحنا متابعينه بعنينا .. و هو بيفتح عربيته جرينا .. عليه سلمنا .. و فكرناه بتريقتنا .. بيشتغل دلوقتي في شركة كبيرة .. وقبل ما يمشي على عمه وصيناه يوصيه علينا.
وقفته .. و لمشواري وصفتله .. و بأجرته الخيالية قاللي .. خفت الأتوبيس اللي كان جه مني يزعل .. و بهديته النهاردة علي يغضب .. سلمته التانية كانت فاضية .. حضرتله أجرته و وراه جريت .. بيمنعني من كرمه جواه .. إني من جيبي أطلع أي حاجة.
دبح و للحمة وزع .. اللي خدوا دعوله .. و اللى ملحقوش زعلوا منه.
قعدنا .. و على موافقة العروسة إتطمنا .. و على توفير الشبكة و المهر و الفرح إتفقنا .. و على الشقة و العفش لربنا حمدنا .. و بالرفاء و البنين دعينا .. كل اللي ربنا يجيبه كويس .. بس لو الأول جه بنت .. هنسميها نــ ... مش مهم .. المهم التاني ييجي واد .. لو جه برده بنت .. يبقى التالت إن شاء الله هيكون واد.
البنطلون واسع .. و كمان عايز أدخل القميص من جوه .. قمت أنا و اصحابي إتفقنا .. و على مول نجوم المدينة أنا و هما نزلنا .. على حزام دورنا .. جينا نشتري إستغلينا .. بس في أوديون دخلنا سيما .. و من جاد كلنا و حلينا.
على المسحراتي نادينا .. و بأسامينا بصوتنا عالينا .. و من لعب الكورة طلعنا إستحمينا .. و بعد السحور على صلاة الفجر إتفقنا .. بعديا نطلع عـ الفرن علشان الصاجات نخبزها .. و لشوقنا لصلاة العيد في مصطفى محمود بنينا.
جنب النيل كان أول معاد .. مكانتش صدفة بس مكانش بينا أي إتفاق .. في عنيها بصيت .. من شايف و من بيلاحظ ما دريت .. و بحبي لقيت كلمتين .. و إيديها في إيديا محمرين.
زمان و أنا صغير .. مكنتش لسه بقيت كبير .. بلعب مع ناس زيي صغيرين .. إيديا إتكسرت .. مش واحدة دول الإتنين .. عليا جريوا .. و عليا طمنوا أهلي .. و للمستشفى وصلوني .. و بعد أسبوع و هما شايلين ورد جم يزورني .. و على إسمي يسألوني.
و فضلت بصالي و مبحلقالي .. فضلت باصصلها .. و صوابعي ضمتها .. و بالبونية و في عنيها هضربها .. قامت خدتني في حضنها .. و بإيديها حطت راسي على كتفها.